Mae Tŷ Cerdd yn galw cyfansoddwyr/crewyr cerddoriaeth heb eu hyfforddi* i gyfle cyffrous i ddatblygu eu sgiliau

 

• A yw eich llwybr i greu cerddoriaeth heb gynnwys llwybrau prifysgol neu gonservatoire ffurfiol?*

• Efallai eich bod yn artist DIY sydd â gwaith digidol, ac eisiau dysgu sut i drosglwyddo eich syniadau i offerynnau cerddorfaol (clarinét, feiolin, soddgrwth a phiano)?

• Efallai eich bod yn ganwr-gyfansoddwr sydd wedi dysgu eich hunan a’ch bod am ychwanegu sgôp a lliw i’ch sain?

• Neu ydych chi’n artist arbrofol sydd wedi dechrau cyfansoddi trwy ffurfiau eraill ar gelfyddyd?

 

Gallai hwn fod yn llwybr i chi!

​

Drwy gyfres o sesiynau mentora un-i-un gyda’r gyfansoddwraig Lynne Plowman – ynghyd ag adnoddau a sesiynau atodol gan Tŷ Cerdd a phartneriaid y prosiect Cerddorfa Genedlaethol Gymreig y BBC – bydd pum crëwr cerddoriaeth yn cael hyfforddiant pwrpasol a sesiynau i ddatblygu sgiliau cyfansoddi ar gyfer offerynnau cerddorfaol (clarinét, feiolin, soddgrwth a phiano). Cynhelir gweithdai o ddechrau mis Hydref 2023, ac ynghyd â’r sesiynau mentora un-i-un, bydd y prosiect yn cynnwys ymweliadau grŵp â pherfformiadau BBC NOW a gweithdai gydag ensemble siambr o berfformwyr BBC NOW, yn ogystal â sesiynau gyda staff BBC NOW a Tŷ Cerdd.

 

Bydd y sesiynau mentora un-i-un yn cael eu trefnu ar ôl recriwtio’r cyfranogwyr ond mae’n rhaid i bawb sy’n cymryd rhan fod yn rhydd ar y dyddiadau canlynol:

• 5 Hydref – hanner diwrnod i ddechrau pethau yng Nghaerdydd (gyda Lynne Plowman ac ensemble siambr wedi’u tynnu o BBC NOW)

• 19 Hydref: cyngerdd #1 (gyda’r nos, Caerdydd) a sesiwn cyn y cyngerdd

• 7 Rhagfyr: sesiwn ar zoom, prynhawn

• 8 Rhagfyr: cyngerdd #2 (gyda’r nos, Caerdydd)

• Ionawr/Chwefror (dyddiad i'w gadarnau): sesiwn hanner diwrnod

• 9 Mawrth: cyngerdd #3 (gyda’r nos, Caerdydd) a sesiwn cyn y cyngerdd

• 9 Mai: cyngerdd #4 (gyda’r nos, Caerdydd) a sesiwn cyn y cyngerdd

• Mai/Fehefin (dyddiad i'w gadarnau): diwrnod gweithdy olaf

​

Pam ni?

• Fel Canolfan Cerddoriaeth Cymru, mae Tŷ Cerdd wedi ymrwymo i gefnogi a datblygu cerddoriaeth Gymraeg newydd o bob math – wedi’i atgyfnerthu gan ein mantra, “Os ydych chi’n creu cerddoriaeth yng Nghymru, cerddoriaeth Gymreig yw hi!”

• Cerddorfa Genedlaethol Gymreig y BBC yw cerddorfa symffoni genedlaethol y genedl, ac mae’n buddsoddi yn natblygiad cyfansoddwyr, yn enwedig drwy Cyfansoddi’r BBC: Cymru sydd wrthi’n gyson yn datblygu. Yr iteriad nesaf o Cyfansoddi: Cymru fydd gwanwyn 2025; mae’r fenter hon Llwybr i’r Gerddorfa yn un o sawl cyfle i gefnogi ystod ehangach o artistiaid i fynd i’r afael ag ysgrifennu offerynnol a cherddorfaol.

• Mae Lynne Plowman yn gyfansoddwraig flaenllaw o Gymru y mae ei gwaith yn cael ei berfformio’n rheolaidd ar lwyfannau ledled y byd. Mae’n diwtor cyfansoddi yng Ngholeg Brenhinol Cerdd a Drama Cymru ac yn gyfansoddwraig breswyl ar gyfer cynllun arloesol Cyfansoddwyr Ifanc Dyfed.

 

A beth amdanoch chi?

• Dydych chi ddim wedi cael hyfforddiant cyfansoddi ffurfiol mewn prifysgol neu conservatoire, ac rydych yn awyddus i ddod ag ansawdd cerddorfaol i’ch gwaith.

• Mae croeso i gyfansoddwyr o unrhyw genre cerddorol, er y byddwch yn gyfarwydd â nodiant cerddorol / yn ei ddefnyddio’n aml.

• Crewyr cerddoriaeth o Gymru  Os ydych yn creu cerddoriaeth wreiddiol a’ch bod wedi byw yng Nghymru ers o leiaf blwyddyn (neu os ydych wedi’ch geni yng Nghymru ond yn byw yn rhywle arall), rydych yn gymwys. Bydd bwrsariaethau treuliau ar gael i artistiaid deithio o fewn Cymru.

• Amrywiaeth   Rydym yn awyddus i dderbyn ceisiadau gan unigolion sy’n cael eu tangynrychioli / sydd wedi wynebu esgeulustod neu allgáu o’r gymuned gelfyddydol; rydym yn croesawu’n arbennig geisiadau gan bobl anabl, pobl Ddu, Asiaidd ac ethnig amrywiol, pobl LGBTQ+, a phobl o gefndiroedd economaidd-gymdeithasol is.

​ 

Os oes gennych ddiddordeb, ond bod gennych ambell gwestiwn…

…gallwn gael sgwrs dros y ffôn neu Zoom. Anfonwch e-bost i drefnu galwad.

  

I ymgeisio…

 …lanlwythwch yr wybodaeth ganlynol i’n porth

 

1.  Manylion personol: eich enw, cyfeiriad e-bost, rhif ffôn symudol, cyfeiriad, cadarnhad eich bod dros 18 oed ac nad ydych wedi astudio cyfansoddi yn y brifysgol nac mewn conservatoire

2.  Dywedwch wrthym am eich gwaith:  Dywedwch wrthym beth rydych yn hoffi ei wneud fel crëwr cerddoriaeth a beth rydych chi wedi bod fwyaf balch ohono. (dim mwy na 200 gair)

3.  Pam fyddech chi’n hoffi bod yn rhan o’r llwybr hwn? Dywedwch wrthym beth yr hoffech ei ddysgu drwy’r llwybr hwn, a sut yr ydych yn gobeithio y bydd yn effeithio ar eich gwaith. (dim mwy na 300 gair)

4.  A oes gennych unrhyw ofynion penodol o ran mynediad? Rhowch wybod os oes unrhyw gymorth neu amodau sydd eu hangen arnoch i’ch galluogi i gymryd rhan yn y llwybr.

5.  Enghreifftiau o’ch gwaith: rhowch 2 ddolen neu atodiadau i’ch cerddoriaeth (noder: anfonwch ddolenni yn hytrach na ffeiliau sain neu fideo; os oes angen help arnoch i greu dolenni, rhowch wybod i ni.)

 

Sylwer: Rydym hefyd yn croesawu ceisiadau ar fideo neu sain. Recordiwch eich atebion i gwestiynau 2, 3 a 4 (i bara hyd at 4 munud), a lanlwythwch ddolen i’ch recordiad. Atebwch gwestiynau 1 a 5 ar y ffurflen a lanlwytho honno hefyd. Os oes angen help arnoch i greu dolen i’ch fideo, e-bostiwch ni i gael cymorth.

 

Yr amserlen a’r broses

• Dyddiad cau cael ceisiadau: 12:00 ganol dydd, dydd Llun 4 Medi.

• Ar y panel bydd Lynne Plowman, Rhonwen Jones (Cerddorfa Genedlaethol Gymreig y BBC) a Deborah Keyser (Tŷ Cerdd) a chewch wybod y canlyniad erbyn Dydd Gwener 8 Medi.​

​

​