Cyfansoddwr, canwr ac ieithydd yw Joseff Gnagbo. Yn wreiddiol o’r Traeth Ifori, mae’n byw yng Nghymru er 2018. Mae ei arddull melodaidd a dawnsiadwy’n adlewyrchu ei gariad at gerddoriaeth soul, reggae a rap. Mae ganddo ddiddordeb mewn cerddoriaeth o wahanol rannau o’r byd ac yn siarad ac yn cyfansoddi yn y Ffrangeg, Saesneg, Cymraeg, Eidaleg, Almaeneg a Swahili. Mae ei waith cyntaf i’w ryddhau, ‘Attention vigilance’ yn dyddio’n ôl i 2011 ac amser rhyfel ac yn alwad i wrthsefyll neo-wladychiaeth. Postiwyd ‘Chez Ngoma’ ar-lein yn 2014 tra oedd Joseff yn Kenya ar ran arall yn ei siwrnai hir o’i famwlad. Mae’n perfformio ei gân ‘Angela’ yn rheolaidd gyda Chôr Un Byd Oasis a chydgyfansoddodd yr hwiangerdd Gymreig ‘Gwenynen Weithgar’ gyda Laura Bradshaw ar gyfer Ymddiriedolaeth Lyfrau Cymru yn 2021. Ar hyn o bryd, mae’n gweithio ar brosiect gyda Chôr Un Byd Oasis a’r bardd o Gymru, Mererid Hopwood.